Gunnarshús í Reykjavík er aðsetur Rithöfundasambands Íslands. Í húsinu er einnig gestaíbúð ætluð erlendum rithöfundum, þýðendum og öðru bókmenntafólki. Húsið er í austurbæ Reykjavíkur (10 mínútna fjarlægð frá miðbænum með strætisvagni). Dvalartími er frá einni uppí átta vikur.

Norðurbær er byggður árið 1900 en hefur verið algjörlega endurbyggður. Aðkoma að húsinu er frá Túngötu en það tilheyrir húsaþyrpingunni sem kennd er við Einarshöfn og er í vestanverðu þorpinu rétt við Bakarísstíg sem liggur milli Túngötu og Eyrargötu.
Húsið er 37m² og þar er anddyri, stofa/eldhús, svefnherbergi og baðherbergi. Verönd er við húsið með borði, tveimur stólum og gasgrilli. Lítill geymslukjallari er undir húsinu. Svefnpláss er fyrir 4.

Lista- og fræðimanna íbúðin á Skriðuklaustri í Fljótsdal stendur til boða endurgjaldslaust. Í skriflegum umsóknum þarf að geta æskilegs dvalartímabils og að hverju listamaðurinn/fræðimaðurinn hyggst vinna meðan á dvöl stendur.

Listamannahúsið Varmahlíð stendur rithöfundum og öðrum listamönnum til boða. Með húsinu fylgir 45 fm vinnustofa. Íbúðarhúsið er búið öllum húsgögnum og tækjum og Hveragerðisbær greiðir kostnað vegna hita og rafmagns. Gestalistamenn fá endurgjaldslaus afnot af húsinu.

Gestaíbúð er á neðri hæð húss skáldsins frá Fagraskógi að Bjarkarstíg 6, Akureyri. Íbúðin er ætluð rithöfundum og fræðimönnum til afnota í lengri eða skemmri tíma gegn vægu gjaldi, hámark einn mánuð í senn. Í íbúðinni eru: svefnherbergi, stofa, skrifstofuherbergi, eldhús og baðherbergi. Allur almennur húsbúnaður og lín er til staðar í íbúðinni, ásamt þráðlausri nettengingu. Nánari upplýsingar hjá Menningarmiðstöðinni í Listagili, Akureyri, s. 466-2609 og netfang listagil@listagil.is

Stofnunin hefur til umráða íbúð í húsnæði sínu fyrir fræði- og listamenn, íslenska sem erlenda. Um er að ræða íbúð á tveimur hæðum og er innangengt á vinnuloft Snorrastofu, þ.e. stórt bókasafn, tölvur og almenna vinnuaðstöðu.

Í Herhúsinu á Siglufirði er gestavinnustofa fyrir innlent og erlent myndlistarfólk, skáld eða aðra sem vinna að listsköpun. Herhúsið er allt nýuppgert að utan sem innan.  Vinnustofan er 70 fermetra salur með um 4 metra lofthæð. Þar er góður iðnaðarvaskur, trönur og vinnuborð og þægilegur sófi sem einnig má nota sem aukarúm.  Baðherbergið sem er á neðri hæð er með sturtu. Í turninum er björt stúdíóíbúð með tveimur rúmum. Í eldhúsinu er ísskápur, kaffivél, brauðrist, örbylgjuofn og tvær rafmagnshellur.

Vinnu- og orlofshús Rithöfundasambandsins í Suðursveit
Húsið að Sléttaleiti í Suðursveit er gjöf Guðrúnar Sveinsdóttur í minningu foreldra sinna og bróður. En einnig til að heiðra minningu frænda sins Einars Braga skálds sem var hestastrákur í Sléttaleiti sumarið 1935. 
Sléttaleiti  stendur í grýttri hlíð rétt tvo km austan við Hala (Þórbergssetur). Útsýni er fagurt austur til fjalla í Nesjum og út á veraldarhafið. 
Ef miðað er við gatnamót Grensásvegar og Miklubrautar í Reykjavík þá eru 381 km að bústaðnum.  

Umsóknir um dvöl að Hrauni skal senda undirrituðum á netfangið tryggvi.gislason@simnet.is. Leigugjald á viku er 24.000 krónur. Skal greiða það í reikning Hrauns í Öxnadal^ehf nr 0565-14-401487, KT 110638-3109, fjórum vikum áður en leigutími hefst. Verða þá sendar frekari upplýsingar um talnalykla að húsinu og öryggiskerfi þess.

Jensenshús sem er í eigu Fjarðabyggðar var byggt  árið 1837 af Jens Peder Jensen.  Jensenshús er elsta íbúðarhús Austurlands og eitt elsta uppistandandi íbúðarhús landsins.  Húsið var friðað 1. janúar 1990. Nýbúið er að gera húsið upp og lagfæra það og nú er það nýtt sem dvalarstaður fyrir lista- og fræðimenn, íslenska og erlenda.   

Ekki er gert ráð fyrir neinni greiðslu vegna dvalar í Jensenhúsi annarri en afnot af síma.  Hins vegar er ætlast til að þeir sem þar dvelja komi á einhvern hátt á framfæri því sem þeir eru að vinna að í sinni list og/eða fræðigrein eða öðrum verkum sínum meðan á dvalartíma stendur.  Gesturinn getur því verið beðinn um að halda sýningu, tónleika, fyrirlestur eða taka þátt í samkomu, skilja eftir listaverk eða eitthvað annað sem um semst milli hans og ferða- og menningarfulltrúa fyrir hönd menningar-, íþrótta- og ferðamálanefndar Fjarðabyggðar.    Verkefni sem efla menningu í Fjarðabyggð munu njóta forgangs í umsóknarferlinu en litið er til fleiri þátta. 

Atvinnu- og menningarnefnd  ásamt menningar- og ferðamálafulltrúa og forstöðumanni Safnastofnunar velur úr innsendum umsóknum í samvinnu við forstöðumann Kirkju- og menningarmiðstöðvar Fjarðabyggðar.  

Þeir sem hafa áhuga á að dvelja í húsinu er bent á að hafa samband við ferða- og menningarfulltrúa Hildigunni Jörundsdóttur, netfang: hildigunnur.jorundsdottir@fjardabyggd.is , sími: 860-4726.  

Kúnstug kjallaraíbúð við Engjaveg í Mosfellsbæ (steinsnar frá Reykjalundi), með öllu sem til þarf fyrir rithöfunda ...

Hér er:

Rúmgóð (20 m²) stofa/vinnuherbergi með skápum, (svefn)sófa, sófaborði, skrifborði, útvarpi, bókahillum (og töluverðum slatta af bókum) og þráðlausu netsambandi, lítið svefnherbergi, skrítið en fullbúið eldhús, snyrting/sturta. Aðgengi og afnot af þvottavél og þvottahúsi.  Stór og blómlegur garður.

Leiga (1 – 2 gestir): 15.000 kr./100 evrur á viku, hiti og rafmagn innifalið. Aukalega f. rúmföt og handklæði  5.000 kr./30 evrur á viku.

3. gestur: 6.000 krónur/40 evrur á viku.

Fallegar gönguleiðir allt um kring, 5 mínútna ganga að strætóstoppistöð (Leið 15, fer á Hlemm, að BSÍ og alla leið út á flugvöll), 2 mínútna ganga að sundlaug (Reykjalundur). 15 mínútna akstur til miðborgar Reykjavíkur.

Ath. Hentar illa fyrir ofnæmissjúklinga – kettir í húsinu og mikill gróður allt um kring.

Leigist eingöngu meðlimum í RSÍ eða systurfélögum erlendis. Leigutími: 1 – 6 vikur, frá föstudegi til föstudags. Áhugasamar/ir sendi línu á avarorn@internet.is